ዩጋንዳ በሶማሊያ ያሰፈረችውን ወታደሮቿን ወደ ሀገሯ መለሰች

አባይ ሚዲያ ዜና
ዘርይሁን ሹመቴ

ዩጋንዳ በሶማሊያ ለሰላም ማስከበር ሂደቱ የመደበቻቸውን ወታደሮች በማስወጣት ወደ ሀገሯ መመለስ እንደጀመረች ተዘገበ።

በሱማሊያ ሰላምን ለማረጋጋት ከየትኛውም አገራት ከፍተኛ ቁጥር ያለው ጦር ያሰፈረችው ኡጋንዳ ከ200 በላይ የሚሆኑትን ወታደሮቿን ከሱማሊያ ማስወጣት መጀመሯ ታውቋል።

በያዝነው የፈረንጆች አመት መገባደጃ በሶማሊያ የሚገኙ ወደ 1,000 የሚሆኑ ከተለያዩ የአፍሪቃ አገራት የተውጣጡ ወታደሮችን እንዲቀነሱ ትእዛዝ መተላለፉ ይታወሳል። በዚህም መሰረት ኬኒያ፣ ኢትዮጵያ፣ ቡሩንዲና ጅቡቲ በሶማሊያ ያዘመቱትን ወታደሮች ከአመቱ መጠናቀቂያ በፊት እንዲቀንሱ ትእዛዝ ተሰጥቷል።

ምንም እንኳን እነዚህ አገራት በሶማሊያ ሰላም ለማስከበር ያደረጉት ጥረት የሚደነቅ ሆኖ እንዳገኘው የተባበሩት መንግስታት ቢገልጽም ህይወታቸውን አደጋ ላይ ጥለው ለሚዋደቁ ወታደሮች መከፈል የሚገባው ክፍያ በሙስና መመዝበሩን ግን ሳይጠቅስ አላለፈም። ከዚህም በተጨማሪ እነዚህ የአፍሪቃ ሀገራት በሶማሊያ የታሰበውን ሰላምና መረጋጋት የማስፈን አላማን አጥጋቢ በሆነ ፍጥነት እውን ማድረግ እንደተሳናቸውም የተባበሩት መንግስታት ገልጿል።  

በአገሪቷ ሰላምንና መረጋጋትን ለማምጣት ከሌሎች አገራት ወታደር ከመለመን ይልቅ ሶማሊያ የራሷ የሆነ የመከላከያ ሃይል መገንባት እንዳለባትና ይህንንም የተባበሩት መንግስታት እንደሚደግፍ ተገልጿል። 

ዩናይትድ ስቴትስ በአየር የምታደርገውን የጦር እርምጃ ተጠናክሮ እንደሚቀጥልና ወደ 500 የሚደርሱ  የዩናይትድ ስቴትስ ወታደሮችም በሶማሊያ ሰፍረው ከሶማሊያ መከላከያ ጋር በጥምረት እንደሚሰሩ ታውቋል።

የኢትዮጵያ መንግስት በቅርቡ ወደ 1000 የሚጠጉ ወታደሮችን ከከባባድ የጦር መሳሪያዎች ጋር በማጀብ ወደ ሶማሊያ ክልል ዘልቆ ማስገባቱ መገለጹም ይታወሳል።

 

Source Article from http://amharic.abbaymedia.info/archives/39864